Почта начальнигы газета-журналларга яздыру планын арттырып үтәде

Әлфинур Мәрданова Минзәлә авыл хуҗалыгы техникумының бухгалтерия бүлеген тәмамлагач, район почта элемтәсенә оператор булып эшкә килгән иде. Шуннан бирле хезмәт куеп почта бүлеге начальнигы дәрәҗәсенә чаклы күтәрелде. Сүз уңаенда әйтергә кирәк, заманында әнисе Әмзидә ханым да район почта бүлегендә иң белемле, эшчән операторларның берсе иде. Яшь булуына карамастан, ул коллективны тиз арада кул астына алып эшли башлады, билгеле бер күрсәткечләргә дә ирешергә өлгерде. 2013 елның беренче яртыеллыгына газета-журналларга яздыру планын арттырып үтәде. Моның өчен Әлфинур "Татмедиа" ААҖнең филиалы Минзәлә мәгълүмат-редакция үзәгенең Мактау грамотасы белән бүләкләнде. Хәзер икенче яртыеллыкка яздыру буенча нәтиҗәле эш алып бара.