Минзәлә районы Дусай-Кичү авылында яшәүче Сәрмәдия Садиковага 98 яшь тулды

1 сентябрь 2026 - 14:12 Автор:

Дифиза Нуриева

30 августта Минзәлә районының Дусай-Кичү авылында яшәүче, тыл хезмәтчәне һәм хезмәт ветераны Сәрмәдия Галим кызы Садикова үзенең 98 яшьлек туган көнен билгеләп үтте.

Ул 1928 елның 30 августында Минзәлә районының Бикбау авылында туган. Сигез яшендә мәктәпкә укырга кереп, биш сыйныф тәмамларга өлгергән. Әмма аның тыныч балачагын Бөек Ватан сугышы өзгән.

Сугышның авыр елларында аңа балалар өчен бөтенләй дә җиңел булмаган эшләрне башкарырга туры килә: ул үгез җигеп, колхоз терлекләренә азык әзерләү өчен ашлыкны эшкәртүдә куллану өчен солярка ташыган.

Бөек Ватан сугышы елларындагы фидакарь хезмәте өчен Сәрмәдия Галим кызы «1941–1945 еллардагы Бөек Ватан сугышында фидакарь хезмәт өчен» медале белән бүләкләнә.

Аның бөтен хезмәт юлы Минзәлә районының авыл хуҗалыгы белән бәйле була. Еллар дәвамында ул берничә һөнәр үзләштерә: кырда тракторчы булып эшли, фермада сыер савучы һәм бозау караучы була, тегермәнче вазифасын да башкара.

Күпьеллык намуслы хезмәте, туган җиренә тугрылыгы һәм район алдындагы хезмәтләре өчен Сәрмәдия Галим кызы күп тапкырлар Мактау грамоталары һәм Рәхмәт хатлары белән бүләкләнә. Аңа «Хезмәт ветераны» дигән мактаулы исем бирелә. 1955 елда кияүгә чыга. Тормыш иптәше белән алар озак һәм тату гомер кичереп, алты бала тәрбияләп үстерәләр.

Бүген Сәрмәдия апаның зур һәм тату гаиләсе бар: 6 баласы, 15 оныгы һәм 23 оныкчыгы. Хәзерге вакытта Сәрмәдия Галим кызы Дусай-Кичү авылында оныгы белән бергә яши.