Минзәлә картлар йортында Тукайга багышланган әдәби кичә үткәрелде

Минзәлә картлар йортында үзәк китапханә хезмәткәрләре «Тукай безнең йөрәкләрдә» исемле әдәби кичә үткәрделәр. Чарада китапханәчеләр Римма Әхмәтханова һәм Ольга Гатиятова шагыйрьнең авыр балачагы, аның тормышы һәм иҗаты турында сөйләделәр. Интернат-йортта тәрбияләнүче әби-бабайлар шагыйрьнең туган ил, туган тел, гади халык тормышы темасына кагылышлы шигырьләрен укыдылар. Кичә ахырында барысы бергә «Туган тел» җырын башкардылар.