Минзәләдән Адилә Ханова туган якның тарихын өйрәнү буенча фәнни-гамәли конференциядә 1 нче урын яулады

Минзәлә шәһәренең 3 нче урта мәктәбе укучысы 7 Б сыйныф укучысы Адилә Ханова Сарман районы Саклаубаш авылында узган фәнни-гамәли конференциядә катнашты. 

«Милли һәм этномәдәни белем бирү: традицияләр һәм заманча приоритетлар» дип аталган Бөтенроссия фәнни-гамәли конференциясенең «Туган як тарихын өйрәнү» подсекциясендә ул «Илебез тарихында гаиләмнең роле» дигән эш белән чыгыш ясады.

Әлеге эштә ул үзенең әтисе Илгиз Ханов ягыннан бабалары — әбиләре, туганнары: Хановлар — Хәмитовлар гаиләсенең 4 буын дәвамындагы тарихы белән таныштырды.

Жюри тарафыннан Адиләнең эш 1 нче урынга лаек дип табылды. Әлеге эшне ул конкурска җизнәсе, әтисенең апасы Ләйлә Кәбированың ире, Татар Мөшегесе мәктәбенең тарих укытучысы Дамир Кәбиров ярдәмендә әзерләде.