Минзәләдә «Ел хатын-кызы. Ел ир-егете: хатын-кыз карашыннан» республика конкурсының зона туры узды

(Дифиза Нуриева, «Минзәлә-информ»)

Конкурс район мәдәният сараенда узды. Конкурсантларны һәм кунакларны шәһәр башлыгы урынбасары Роза Салдаева, «Татарстан хатын-кызлары» төбәк иҗтимагый оешмасы советы әгъзасы, Минзәлә мәктәп-интернаты попечительләр советы рәисе Гүзәлия Ахмадиева сәламләде.

Гүзәлия Әхмәдиева үзенең чыгышында әлеге конкурсның инде 28нче тапкыр уздырылуын билгеләп үтте һәм барлык катнашучыларга уңышлар теләде. 
Зона турында безнең районны 4 хатын-кыз һәм бер ир-ат тәкъдим итте. 

«Хатын-кыз— ана» номинациясендә күп балалы әни, гимназиянең татар теле һәм әдәбияты укытучысы Гөлнара Заһриева катнашты һәм җиңүче булды. 

«Хатын-кыз — галим» номинациясендә гимназиянең милли мәгариф буенча директор урынбасары Лилия Галиева катнашты һәм лауреат булды. 

«Минем язмышым — минем һөнәрем» номинациясендә ике конкурсант катнашты: КСЦОНның социаль хезмәткәре Татьяна Бокова һәм Минзәлә интернат-йортының шәфкать туташы Венера Сәлманова. Татьяна Сергеевна җиңүче, ә Венера Рафисовна лауреат булды. 

«Ир-ат — лидер» номинациясендә районыбыз данын мәктәп-интернат директоры Нурхади Гильфанов яклады һәм җиңүгә иреште 
Барлык катнашучылар да жюри кулыннан дипломнар, чәчәк бәйләме һәм бүләкләр алдылар.