Рәмзия Сибгатуллина шигыре

Абыема

Көтмәгәндә, 2016 елның 8 сентябрь көнне

Бикбау авылы егете -Шәрипов Наил Ягъфәр улын

Пермь өлкәсендә җирләргә туры килде.

Әллә язмыш, әллә ялгыш,

Гомерең узды ерак калада.

"Ризык - кайда, бәндә - шунда", -

Дигән иде ерак бабам да.

Балык тотып, коенып үстең

Бөдрә таллы Ыкның суында.

Безгә - Абый, өч улыңа

Терәк идең язмыш юлында.

Язмышлардан узмыш юк шул,

Беркем белми ниләр күрәсен,

Бер Ходайга сыенам мин,

Юк бит газиз әткәй-әнкәем.

Авыр туфрак җиңел булсын,

Гәүдәң калды ерак җирләрдә.

Туган якның саф җилләрен

Юллап калам һәрбер иртәдә.

Мөселманның һәр шартын

Үтәгәндәй тоелдык.

Рәнҗеп ятма, Абый, берүк,

Аллаһыдан шуны сорадык.