Сәхия Федотова — «Чишмә»

ЧИШМӘ

Кичен кояш баеганда
Карыйм чишмә ягына.
Нишләтергә үз-үземне,
Сине өзелеп сагынам.

Авылыбыз чишмәләре —
Көмеш кебек сулары.
Беләсе иде бу егетнең
Ерактамы уйлары.

Татлы уйларга күмелеп
Төшәм чишмә башына.
Яратам дип язып куйган
Чишмәләрнең ташына.

Авылым чишмәләренең
Таш түшәлгән юлына.
Җаныкаем, кала күрмә 
Чит-ятларның кулына.

Җил булып исәр идем лә,
Иделне кичәр идем.
Әле дә син бар юанычка,
Булмасаң нишләр идем.

Сәхия Авзалова — Федотова.