Юшады авыл җирлегендә клуб ремонтлыйлар

Илшат Вагыйзов, «Минзәлә-информ»

Түбән Юшады авылында клуб бинасы ремонтлана. Эшләр грант акчасына алып барыла. Бу хакта «Минзәлә-информ» га Юшады авыл җирлеге башлыгы Илгиз Ханов хәбәр итте.

— Быел Түбән Юшады авыл клубы «Муниципаль районнарның административ үзәкләре булмаган авыл җирлекләренә һәм шәһәр җирлекләренә грантлар турында» республика конкурсында, шулай ук «Авыл җирлекләренең социаль әһәмиятле объектларын ремонтлау» максатыннан «Агросила» АҖ грантында җиңде, — диде ул. 

Эшләр исемлеге түбәне алыштыруны, фасадны ремонтлауны, тәрәзәләрне, керү ишекләрен урнаштыруны, отмостканы ремонтлауны, идәнне алыштыруны үз эченә ала. Эшләр югары темплар белән "Лига"ҖЧҖ төзүчеләре тарафыннан алып барыла.

Узган ел Каран-Азик авыл клубында да эшләр башланды. Биредә клуб территориясе койма белән әйләндереп алынган. Киләчәктә бинаны ремонтлау планлаштырыла.

Фотолар Юшады авыл җирлеге архивыннан.