Минзәләдә Мәдәни мирас йортында Корбан бәйрәме уңаеннан бәйрәм табыны әзерләнде

Минзәлә шәһәренең Мәдәни мирас йортында инвалидлар җәмгыяте (җитәкчесе Вера Сидорова) оештырган Корбан бәйрәме узды.

Бәйрәмнең төп йоласы буенча, кунакларны корбан итеп чалынган сарык итеннән әзерләнгән шурпа белән сыйладылар. Итне җәмгыять әгъзалары Минзәлә мәчетеннән алып кайттылар. Мул итеп әзерләнгән табында шулай ук традицион татар ризыклары һәм тәм-томнары тәкъдим ителде.

Дамира апа Фәтхуллинаның Коръәннән аятьләр, Ясин сурәсен укуы мәҗлестә катнашучылар өчен рухи тынычлану, чистарыну һәм бердәмлек атмосферасын тудырды.