Минзәлә районында язгы кыр эшләре

Дильфас Галиев, 22 апрель 2019 - 09:09

730

Язгы кыр эшләрендә “Калморза” хуҗалыгы игенчеләре әйдәп баралар. Аларда күпьеллык үләннәрне һәм көзге культураларны өстәмә тукландыру, тырмалау төгәлләнде, дым каплату 90,5 процентта башкарылды. Бу хуҗалык кичә-100 гектар арпа һәм 50 гектар борчак чәчәргә дә өлгерде.

Район авыл хуҗалыгы һәм азык-төлек идарәсе мәгълүматларыннан күренгәнчә районыбыз хуҗалыкларында көзге культуралар-8700, күпьеллык үләннәр-6700 гектарда өстәмә сый алган, шулай ук көзге чәчүлекләр-6200, күпьеллык үләннәр-7300 гектарда тырмаланган, дым каплату 27200 гектарда башкарылган. Язгы чәчү өчен орлыкның 3100 тоннасы инкрустацияләнгән. “Мензелинские зори” агрофирмасы игенчеләре 500 гектарда гәрчич чәчтеләр. Шулай ук "Заиковский" хуҗалыгы механизаторлары көнне-төнгә ялгап эшләп күпьеллык үләннәрне тукландыруны тәмамладылар, көзге культураларны өстәмә тукландыруны-67, күпьеллык үләннәрне тырмалауны-91,2, көзге культураларны тырмалауны 66,7 процентта, дым каплатуны 28,7 процентка башкардылар. Әле яңа гына оешкан “Мөслим-Август” ҖЧҖнең Минзәлә бүлекчәсе механизаторлары көзге культураларны 1035 гектарда өстәмә тукландырдылар, көзге культуралар тырмалауны 515 гектарда башкардылар, 5455 гектарда дым каплаттылар. Бүген иң мөһим мәсьәлә-кыска вакыт эчендә чәчүлекләрдә дым каплатуны тиз арада төгәлләү бурычы тора.