Бөек Ватан сугышы ветераны Михаил Тихонов Җиңү бәйрәме белән котларга килгән кунакларны күтәренке кәеф белән каршы алды

(Дифиза Нуриева, “Мензеля-информ”)

Бөек Ватан сугышы ветераны Михаил Тихонов кунакларны үз өенең капка төбендә хәрби киемнән, яхшы кәеф белән каршы алды. Ул һәркем белән ачылып сөйләшә, сугыш елларын искә ала, яшь буынга үз киңәшләрен бирә.

Татарстан Дәүләт Советы депутаты Азат Хамаев, Минзәлә районы башлыгы Айдар Салахов ветеранны Бөек Җиңүнең 77 еллыгы белән тәбрик итеп, аңа Татарстан, район һәм “Бердәм Россия” партиясе бүләкләрен, котлау открыткаларын тапшырдылар.

Ветеран район мәдәният сарае агитбригадасы артистларының патриотик рухтагы җырларын яратып тыңлады, кушылып җырлады һәм хәтта биеп тә алды.

Михаил Тихонов:

–Без, ветераннарны, шулай хөрмәтләвегез өчен бик зур рәхмәт. Россия һәрвакыт көчле ил булды һәм булачак. Шушы илдә яшәвем белән горурланам.