Минзәлә район сукырлар җәмгыяте фестивальдән җиңүләр белән кайтты

Фидалия Шәймәрданова, Минзәлә район сукырлар җәмгыяте рәисе:

– “Җиңү салюты” Бөтенроссия фестивале алтынчы тапкыр үткәрелде. Фестивальгә бик җитди карадык, шуңа күрә кат-кат репетицияләр ясадык. Чөнки бу фестиваль илебез азатлыгы өчен башларын салган каһарманнарыбыз истәлеген зурлау, хөрмәтләү билгесе дә. Тырышлыгыбыз бушка китмәде – призлы урыннар һәм дипломнар белән кайттык. Шушы фестивальдә җиңүләргә ирешүебездә аккомпаниатор Данир Фәхретдиновның өлеше зур булды, без аңа тирән рәхмәтебезне җиткерәбез. Татар һәм рус телендә җыр башкарган хор коллективы 3 урынны яулады. Людмила Петрова бик тә сәнгатьле һәм күңелләрне әсәрендерерлек итеп шигырь укыды, диплом белән бүләкләнде, шулай ук Венера Вәлиева шушы ук “Нәфис сүз” номинациясендә 3 урын алды. “Солист-вокалист” номинациясендә Нина Фадеева, Валентина Автулева, Лениза Якиева призлы урын яуладылар. Биючебез Надежда Волощенко үзенең хореография буенча осталыгын тәкъдим итеп 2 нче урынны яулады. “Илһам” татар вокаль ансамбле икенче, “Русская песня” вокаль ансамбле 3 нче урынга лаек булды. Шушы фестивальдә катнашып, безнең районыбыз данын яклауга өлеш керткән сәхнә осталарының һәркайсына зур рәхмәтебезне җиткерәсе килә. Алга таба да сәхнәдән аерылмыйча яшәп, минзәләлеләрнең күңелләренә яшәү дәрте өстәп торсагыз иде.