Гөлназ ТАЛИПОВА - Әллә ни булды улыма

Әллә ни булды улыма,

көйсезләнә, уйнамый.

Әтисе уенчык ташый -

ә ул никтер юанмый.

Инде идәндә аяк та

басар урын калмагач,

Улым уенчыкларына

һич күңелен салмагач,

Ирем белән сөйләштек тә,

( киңәшләшмичә түгел),

улымның туган көненә

алып кайттык бер сеңел.

И шатланды улым шундый:

сеңленнән күз алмады,

апаена күрсәтмәгән

бер уенчык калмады!

Кызым елый башласа да

беренче чаба улым:

я битеннән үбеп ала,

я сыйпап тора кулын.

Үзгәрде-куйды дөньясы,

беркемгә моңсу түгел:

Тормышыбыз ямьгә күмә

Бер абый һәм бер сеңел!