Тауасты Байлар авыл җирлеге башлыгы авыл уртасындагы ике катлы бина турында сорауга җавап бирде

Редакциягә Тауасты Байлар авылы үзәгендәге ике катлы бина язмышына карата борчу белдергән укучыдан хат килде.

«Минзәлә районы Тауасты Байлар авылының исеме җисеменә туры килә — бик матурайган, йортлар яңартылган, урамнар чиста, юлларга асфальт җәелгән. Ә шулай да авылның бер бинасын бик ямьсез күңелсез хәлдә күрергә туры килде. Элек бу ике катлы йортта колхоз идарәсе, авыл советы, почта бүлекчәсе гөрләп эшләп торган. Ә хәзер тәрәзәләре ватылган, ишекләре кыйшайган. Бу ике катлы йортның җаваплы кешесе юк микән ни, ник болай тәртипсез хәлдә тоталар. Колхозлар бетте дип биналар да бетәргә тиеш түгелдер», — дип яза Яр Чаллы шәһәреннән Сания Г.

Без бинаның язмышы белән кызыксынучы сорауны Тауасты Байлар авыл җирлеге башлыгы Зөлфия Гәрәевага юлладык. 

— Әйе, ул бина безне дә борчып торды. Якын киләчәктә кешеләр йөриячәк бер үзәккә әйләнәчәгенә шигем юк. Чөнки бинаны авылыбыз эшмәкәре Ильяс Гәрәев сатып алды һәм авыл мәхәлләсенә тапшырды. Анда мәчетнең икенче өлеше — дини үзәк булачак. Почта шунда кала — ул «Почта Россия» милеге.

Хатта җирлек тормышына кагылышлы башка сораулар да күтәрелгән. Әлеге сораулар һәм аларга җаваплар белән «Минзәлә» газетасының 21 июнь, 2024 санында танышырга була.