Минзәләдә Кар бабайлар парады

Яңа ел алдыннан шәһәребезнең 2нче санлы "Алтынчәч" балалар бакчасының барлык группаларында да "Кар бабайлар" парады дигән иҗади конкурс уздырылды. Анда балалар, әти-әниләре белән берлектә, үзләре теләгән материалдан Кар бабайлар ясарга тиешләр иде. Ата-аналарның һәм нәниләренең фантазиясенә чикләр юк: кемдер кәгазьдән ябыштырган, кемдер тукымадан теккән, пенопласт, мамык, марля, синтепон кебек ак материалларны да киң кулланганнар.

Ә менә кечкенәләр төркемендә Нәҗмиевлар һәм Ореховлар гаиләләре барысын да уздырганнар: олы кеше зурлыгында Кар бабай ясау өстенә сирәк материаллар да кулланганнар. Илүзә Һәм Илфир Нәҗмиевлар Кар бабайны ак пластик стаканнардан җыйганнар. Нәниләрне сөендерер өчен вакытларын да, акчаларын да кызганмаганнар, ә нәтиҗәсе - искиткеч. Моның өчен якынча 350 стакан киткән.

Наилә һәм Владимир Ореховлар да иренмәгәннәр: каты каркас ясап, шуңа синтепон ябыштырганнар: әйтерсең яңа гына ап-ак кардан әвәләп алып кергәннәр Кар бабайны! Кулына бияләп кидертеп, себерке тотырырга да онытмаганнар. Башындагы чиләген дә килешле төскә буяп куйганнар.

Әлеге конкурстан балалар да, ата-аналар да зур канәгатьләнү алдылар.