Минзәләнең яшь мөселманнарын республика форумында катнашырга чакыралар

(Минзәлә, Илшат Вагыйзов, “Минзәлә-информ”) Минзәлә районының 18 яшьтән алып 30 яшькәчә мөселманнарын 15 августтан 22 августка кадәр булачак Мөселман яшьләр форумында катнашырга чакыралар. Бу хакта Минзәлә район имам-мөхтәсибе Рәмзил хәзрәт Садыйков хәбәр итте.

- Быелгы 10 юбилей Мөселман яшьләр форумында барлыгы 100 кеше генә катнаша алачак, шуңа күрә теләкләре булганнар мөмкин кадәр тизрәк теркәлсеннәр (сылтама) я безгә хәбәр итсеннәр. Барырга теләүчеләрнең шулай ук коронавирус белән авыручылар белән элемтәдә тормаулары хакында белешмәләре булырга тиеш. Форумда егетләр дә, кызлар да катнаша ала, - диде ул.

Форумда катнашучылар өчен 5 мәйданчык: “Коръән”, “Этика”, “Проектлар”, “Туризм”, “Медиа” эшләячәк. Танылган белгечләр әлеге юнәлешләр буенча үз белемнәре белән уртаклашачаклар.