Минзәләдә Нәүрүз бәйрәме узды

Бәйрәмнең төп үзенчәлекләренең берсе — Минзәлә районындагы Татарстан халыклары дуслыгы ассамблеясе вәкиллеге каршындагы татар, таҗик,  әзербайҗан һәм үзбәк милли берләшмәләренең актив катнашуы. Һәр берләшмә бәйрәм кунакларына үзенең милли ризыкларын тәкъдим итте.

Төп сәхнәдә халык җырлары һәм биюләре белән үрелеп барган театральләштерелгән тамаша урын алды. Милли берләшмәләр җитәкчеләре кунакларны Нәүрүз бәйрәме белән котладылар. Минзәлә шәһәре башкарма комитеты җитәкчесе Рамил Шәйсуваров та кунакларны яз бәйрәме белән тәбрик итте. 

Бәйрәмнең кечкенә кунаклары өчен күңелле уеннар һәм кызыклы чаралар оештырылды. Балалар махсус әзерләнгән конкурсларда һәм уеннарда катнашып, вакытларын күңелле үткәрде. 

Бәйрәмгә чыгучы һәркем кайнар коймак, пылау, чәй белән сыйлана алды.