Чәчәкләр белән аңлашу

Күптән түгел генә ике ир-ат җитәкченең сөйләшеп торуына шаһит булдым. Алар чәчәкләр турында сөйләшәләр иде. Аларның берсе үзенең нинди­дер тантанада катнашуын һәм шунда чәчәк аркасында оятка калуын сөйләп алды. Баксаң, дәрәҗәле кунаклар алдында ул үзенең хезмәткәренә (ха­тын-кызга) кып-кызыл роза­лар бүләк иткән. Шунда нәрсә булган дисез? Тантанада­гылар барысы да кычкырып көлеп җибәргәннәр. Янәсе, ул шушы хезмәткәренә тыгыз элемтәләрен, гыйшык хисен аңлатучы кызыл розалар бүләк иткән. Шундый кыен хәлдә кал­мас өчен кемгә нинди чәчәк, кайсы төстәгесен бүләк итәргә икәнен белеп тору берәүгә дә зыян итмәс. Өстәвенә, гүзәл затларыбызның бәйрәмнәре дә якынлаша...

Сүзебезне роза чәчәкләреннән башлыйк әле. Чыннан да, ха­тын-кызларга бүләк ителүче чәчәкләр арасында иң по­пуляры - роза чәчәкләре. Ак төстәгеләре гүзәллекне, бер- береңә булган якты хисләрне аңлата. "Мин сине яратам" - бу сүзләрне кызыл, алсу төстәге розалар аңлата, шул ук вакыт­та алар тирән хисләрнең көчле булуын белдерә. Алсу роза - ышаныч билгесе. Еш кына сары розаларны аерылышу тойгысын белдерүче чәчәк дип уйлыйлар. Әмма хәзерге вакыт­та аны башкачарак билгелиләр, әйтик, бәхет һәм гармонияне, аралашудан шатлык алуны, эчкерсезлекне, бер-береңә ка­рата яхшы мөгамәләдә торуны чагылдыручы дип саныйлар.

Әйе, чәчкәләрнең төсләре билгеле бер мәгънә аңлата. Мәсәлән, ак төс - сафлык, хөрмәт, ал - ярату, кызыл - дәртле гыйшык, сыек зәңгәр - ышаныч, зәңгәр - тугрылык, яшел - өмет, сары - эчкерсез­лек, көч-куәт, аксыл шәмәхә - буйсыну, куе шәмәхә - дус­лык, әфлисун төсе - чытлы­клану, горурлык, алтын төсе - дәрәҗәлелекне белдерә. Шулай да кайсы чәчәк нәрсә аңлата соң? Күкчәчәк - ышаныч, үрмәле гөл - дуслык, кыңгырау - сөйкемлелек, төнбоек һәм энҗе чәчәк - гөнаһсызлык, сафлык, резеда - изге күңеллелек, мар­гаритка - тыйнаклык, миләүшә - саф күңеллелек.

Ир-атларга рәхәт: алар чәчәкне барлык хатын-кызларга да һәм теләсә нинди бәйрәм уңаеннан, шулай ук үзләре теләгән вакыт­та бүләк итә ала. Ә хатын-кыз бары тик хатын-кызларга һәм үзләреннән өлкән ир-атларга гына чәчәк бүләк итә ала. Ир кешегә озын сабаклы чәчәкләр бирәләр, мәсәлән, канәфер, роза, хризантема.

Иң беренче очра­шуда, танышканда яки кемнең дә булса өенә беренче тапкыр кергәндә үпкәчеллек, җилбәзәклек, ялкын­лы сөю кебек хисләрне аңлатучы барбарис, ва­лериана, сары левкой, гранат кебек чәчәкләрне бүләк итәргә ярамый. Ә күптәнге танышыгызны чәчәкнең нәкъ менә ул яратканын биреп сөендерү әйбәт.

Букетны башка кеше аша җибәрергә уйласагыз, чәчәкләр арасына ви­зиткагызны кыстырырга онытмагыз. Аноним букет бүләк алучыны аптырашта калдырыр һәм шатландыр­мас. Үзегез тапшырганда, букетны сул кулга тотыгыз, уңы күрешер өчен буш калсын. Чәчәкләрне төргән кәгазеннән чыгарыргамы, юкмы, дип тә икеләнеп куябыз кайчак. Моны­сы инде нәрсәгә төрүгә бәйле. Әгәр букет затлы һәм зәвыклы итеп төрелгән булса, бу ма­турлыкны нигә бозарга. Хәер, бусагадан ук чәчәкне иясе ку­лына тоттырсаң, сүтмәскә, өй эченә кергәч кенә тапшырган­да сүтәргә, дигән кагыйдәгә таянсаң гына инде.

берничә фазадан тора.