Татарстанда фәнни медицина коллективы яңа имплантант ясап чыгарды

Казанда фәнни медицина коллективы эренле һәм йогышлы сынуларны дәвалау өчен яңа имплантат эшләгән, ул инде беренче клиник сынауны уңышлы узды. Операция Республика клиник хастаханәсендә үткәрелгән, пациент чыгарылырга әзерләнә, дип хәбәр итә ТАСС РФ Мәгариф һәм фән министрлыгы матбугат хезмәтенә сылтама белән.

Имплантатны ел ярым дәвамында Казан федераль университеты, Казан дәүләт медицина университеты һәм Республика клиник хастаханәсе коллективы эшләде. Сөяк эчендәге штифт бер үк вакытта сынуны терки һәм алтынсу стафилококк китереп чыгарган катлаулануларны да кертеп, инфекцияне локаль дәвалауны тәэмин итә.

Проект белән КФУның Лобачевский исемендәге Математика һәм механика институты кафедра мөдире Оскар Саченков җитәкчелек итте. Клиник апробациядә КДМУның травматология, экопедия һәм экстремаль халәтләр хирургиясе кафедрасы мөдире Илдар Әхтәмов катнашты. Имплантатның челтәр структурасында сөяк цементыннан антибиотиклар бүлеп чыгаруны КДМУның гомуми патология кафедрасы мөдире Сергей Бойчук һәм табиб Рәшит Шәфигулин тикшерде.

Катлаулы этапларның берсе металл үрнәкләр җитештерү булды: лабораториядә титан белән эшләү өчен үз 3D-принтерлары юк иде. Прототипларны әзерләүне 3D-принтерлар эшләү белән шөгыльләнүче партнерлык оешмасы белән хезмәттәшлек нәтиҗәсендә тәэмин итеп булды, бу кирәкле эшләнмәләрне оператив рәвештә ясарга мөмкинлек бирде.