Татарстанда Гонконг гриппының 149 очрагы теркәлгән

Роспотребнадзор мәгълүматы буенча, 8 декабрьдән 14 декабрьгә кадәр аралыкта авыруның 19 184 очрагы теркәлгән. Күрсәткеч алдагы атна дәрәҗәсеннән югарырак, әмма эпидемия бусагасы чикләрендә кала.

Соңгы атнада авыру структурасында грипп өлеше 74% тәшкил итте. Лаборатор рәвештә 1 090 очрак расланган, шуларның 149ы — A(H3N2) штаммы китереп чыгарган Гонконг гриппы. COVID-19 авыруы узган елның шул ук чоры белән чагыштырганда 2,7 тапкырга кимрәк.

Уку елы башыннан иртәнге «фильтрлар» барышында югары температуралы һәм ОРВИ билгеләре булган 10 561 укучыны дәресләргә кертмәгәннәр. 35 мәктәпнең 92 сыйныфында уку процессы өлешчә туктатылган, ике мәгариф оешмасы тулысынча ябылган.

Чыганак: «Татар-информ».