Мәктәп балалары җәйге каникулда акча эшлиләр

Ильяс Исмәгыйлов(рәсемдә) белән без «Кама беконы» ҖЧҖнең Коноваловкадагы терлекчелек комплексында таныштык. Ул Минзәлә гимназиясенең 8 нче сыйныфын тәмамлаган.. Аның әйтүенә караганда, ул җәй башында ук эшкә урнашкан.

Ул бик тыйнак: «Төрле эшләр башкаручы булып урнаштык, көчебездән килмәгән эшне кушмыйлар, шуңа күрә авыр түгел. Көн саен төрле эш. Чүп үләннәрен утап, терлекчелек комплексы тирәләрен җыештырып торырга ярдәм итәбез», ди. 
Аның белән бергә Аяз Галиев, Ринат Вәлиев һәм башкалар эшлиләр. Аларны иртән иртүк җәмгыятьнең автобусы Минзәләдән алып китә, кичке якта 15,30 минутта Минзәлә шәһәренә кире кайтарып куя. Үсмерләр атнага өч көн эшләп, 4 көн ял итәләр. Айга 22 мең сум хезмәт хакы вәгъдә иткәннәр үзләренә.