Изгелекне күрә беләләр

Конкурсны оештыручылар - ТР Министрлар кабине­ты һәм Хәйриячелек эшчәнлеге мәсьәләләре буенча республика советы.

Әлеге чарада безнең районнан да район башлыгы Рәсим Садыков җитәкчелегендә 18 кешелек деле­гация катнашты. Алар арасында "Ел хәйриячесе" конкурсы җиңүчесе - "Минзәлә автотранспорт пред­приятесе" ААҖ җитәкчесе Рамил Кәримов, социаль яклау бүлеге начальнигы Татьяна Мясникова, соци­аль хезмәт күрсәтү учреждениеләре директорлары Илсөя Хәбибуллина, Татьяна Вахрушева, Светлана Миңнекаева, Татьяна Железкина, коррекция интер­нат-мәктәбе директоры Камил Нәҗмиев, тәрбиягә җиде бала алган Емельяновлар гаиләсе бар иде.

189 номинант арасында конкурс комиссиясе 2011 елның 88 җиңүчесен билгеләде. Алар 3 млрд сум­нан артык суммада хәйриячелек эшләре башкарган­нар. "Минзәлә автотранспорт предприятиесе" ААҖ "Эре һәм уртакул предприятиеләр" номинациясендә җиңүчеләрнең берсе дип табылды. ТР Президенты Рөстәм Миңнеханов предприятие җитәкчесе Рамил Кәримовка хәйриячелек эшчәнлеге өчен истәлек дип­ломы һәм медаль тапшырды.

"Ел хәйриячесе" конкурсына нәтиҗәләр чыгару танта­насы быел бишенче тапкыр узды. Республикабызда традицион рәвештә уза торган "Мәктәпкә җыенырга ярдәм ит" акциясе кысаларында 2011 елда гына да 13 млн сумнан артык акча җыелган. Минзәлә районы буенча 381,5 мең сум акча тупланган. Күпбалалы һәм азкеремле гаиләләрдә тәрбияләнүче 24 мең бала яңа уку елын лаеклы каршы алды.

Өлкән буын вәкилләре - аеруча Бөек Ватан сугышы ветераннары, ялгыз һәм өлкән яшьтәгеләр, ветераннарның тол хатыннары да онытылмый. "Ком­пьютер грамотасызлыгын бетерү" проекты кысала­рында 13 мең граждан (Минзәлә районы буенча - 90) курслар узды. Пенсионерларны компьютер грамота­сына өйрәтүне дәвам итеп, быел РФ Пенсионерлар союзының ТР буенча төбәкара бүлекчәсе инициати­васы белән "Интернет - озын гомерлелек" проекты старт алды.

Республикабыз хәйриячеләре күпбалалы һәм тәрбиягә бала алучы гаиләләргә һәрдаим ярдәм итеп торалар. 2011 елда гына да Татарстанда 2183 гаилә тәрбиягә бала алган. Әлеге тантанада Рөстәм Миңнеханов 17 күпбалалы гаиләгә "Мегафон" элемтә операторы тәкъдим иткән (ата-ананың икесенә дә) бүләк трафигы белән махсус тариф планын тоташты­руга сертификат һәм кәрәзле телефоннар тапшыр­ды. Райондашларыбыз - Емельяновлар гаиләсе дә (рәсемдә) Президент кулыннан әлеге бүләкне алу бәхетенә иреште.