Минзәлә театры тантаналы рәвештә 90 нчы иҗат сезонын япты

С.Өметбаев исемендәге Минзәлә татар дәүләт драма театры 30 июнь көнне 90 нчы сезонына йомгак ясады. Ябылу тантанасында Минзәлә районы башлыгы урынбасары Наил Хисамбеев та катнашты. Үз чыгышында ул театр коллективының районда узган һәр чарада катнашып, үз чыгышлары белән бәйрәмгә матур төсмер өстәүләрен, республика районнарына гына түгел, Россиянең башка төбәкләренә дә спектакльләрләр белән чыгуларын, төрле фестивальләрдә катнашуларын һәм үзләрендә дә зур масштабта Россиякүләм фестивальләр уздыруларын ассызыклап узды. 

Театр директоры Фаяз Хизбуллин исә сезон дәвамында театр белән бергә булган тугры тамашачылар адресына рәхмәт сүзләрен җиткерде. Киләчәктә дә театр белән бергә калырга чакырды. 
Сезон ябылу тантанасында фидакарь һәм күпьеллык тырыш хезмәтләре өчен театр артистларына һәм хезмәткәрләренә төрле дәрәҗәдәге дәүләт бүләкләре тапшырылды. 

Мәдәнияттәге казанышлары өчен күкрәк билгесе белән театр костюмерының рәссам модельеры Татьяна Петрова бүләкләнде. 
ТР Мәдәният министрлыгының мактау грамотасына ТРның Халык артисты Хафиз Хамматуллин һәм ТРның атказанган артисты Әхнәф Исрафилов лаек булды.
Минзәлә районы башлыгының Рәхмәт хаты артистлар — Зөлфирә Гәрәева, Нәфис Гайфуллин, Илдар Халиков, Илмир Кашапов, Рөстәм Зиннуровка тапшырылды. 

Шул ук көнне «Сәхи(я)» спектакльнең премьерасы да булды.

Автор фотолары.